生與不生

最近新聞透視做了一個《生與不生》的節目, 搵o左兩個唔同o既家庭作分享:

一個準備生第6位小朋友o既媽媽 (呢位媽媽我都認識, 佢係我們10月媽媽會o既媽媽, 而且佢位五呀哥仲同芝士餅同年同月同日出世呢), 佢o地屋企雖然叫做低收入家庭, 但係冇拎任何綜援之下都可以生6個, 佢提出「平有平養」, 佢o既小朋友個個都好開心, 好有自理能力

另一位就係typical o既中產家庭, 幫小朋友報讀私立學校, 為o左個portfolio, 小朋友上緊一d佢自己唔太喜歡o既課外活動, 而位家長更計算出e家養一個小朋友已經由4百萬升到5百萬

呢兩個係好extreme o既case.............

我絕對相信「平有平養」, 只要父母對小朋友有愛, 小朋友都可以好開心地成長

只係..............

我係一個好地道好現實o既香港人/家長, 我絕對相信我唔可以好超然好灑脫貢唔去同人比較, 唔count on 一d現實o既包袱 (只不過程度上同果位爸爸會有所唔同, 而且自己都afford唔起太貴o既乜乜物物啦)

加上現今o既教育制度好像唔鼓勵小朋友努力讀書就有機會考中d傳統好學校 (因為呢d老牌名校個個都轉晒直資/私立學校, 家長由細俾唔起$$或是那個不知所謂o既小學大抽獎抽唔到麼, 以後想再入就機會渺茫), 呢一點我係唔係真的可以唔去考慮 (可能我太災難小姐上身啦)

所以舊年我都self-assess過自己生唔生多件好 (按此)

今年O既龍年效應真的好強, 我們2010年10月媽媽會已經好多人生-ed龍b or 懷胎中

當然又會再trigger呢個問題, 自問自己真的好喜歡小朋友, 特別係粉團bb

可是, 當了媽媽後卻發現自己並唔係一位好媽媽............

而身為父母真係需要好多學問 (明白個個父母都唔係天生識做人呀爸呀媽, 係需要同小朋友一齊努力, 一齊學習)

一路上, 我都發覺自己有好多的不足.............每每睇完d育嬰文章書籍, 點樣去同小朋友溝通/講說話已經好大學問

而我係一個冇耐性, 唔專心/用心, 懶散o既人.............成日都乜乜77貢, 呢d缺失真係身為父母o既大敵 

加上工作o既關係, 日日腦作戰腦震盪................好多時返到屋企真係唔想再郁, 拎住d書同教具有時都冇心機同餅玩 (之後又會好鬼後悔), 所以我由衷佩服果d早教媽媽搵research同好堅持去implement  (btw, 懶骨頭其實會係乜都做唔好)

呢排Ali妹放暑假, 成日都會過來我們屋企住幾晚, 對住呢兩隻超級小魔怪, 大部份時間都令人都癲

佢o地大部分時間都係好噪好噪貢爭玩具, 大唔讓細, 細又唔聽大講, 見到都真係暈得一陣陣

.................

不過, 當佢o地糖痴豆果陣, 互相摟摟抱抱咩, 又真係sweet到震

睇來, 呢個topic重新計算再計算再計算都搵唔到個好結果, 哈

即係....................

...............

....

我今篇post係廢的