kids AIR CREW 2014

個台北遊記只要起o左個頭...............

.............唔知會唁會有尾啦, wakakakaka ~

不過, 等我又跳下update下芝士餅呢個復活節做o左d乜先

2014.04.19 (星期六)

呢日芝士餅約埋佢幼稚園d同學仔一齊扮空姐呀!

呢個活動係星島集團搞的 (http://www.studentmoveup.com.hk/events.php)

去年正當衝上雲霄熱播時, 芝士餅堂家姐都有參加呢個活動扮Cool魔

hehe, d小朋友著住d飛機師衫好型 (當然實際上未必學到好多野 :p)

呢個活動要3歲以上o既小朋友才可以參加

早陣子有2010.10媽媽會朋友話組團, 可惜唔夠人成唔到團

於是我便試下問下芝士餅幼稚園d同學仔, end up 成o左兩團空姐團 (每團8人)

其實我自己想芝士餅做飛機師多d, 不過可能參加o既同學仔都係女孩子

所以投票結果就是空姐勝出!!

當日去到報到完就去換制服 (原先打算帶埋豬仔包一齊來, 可惜豬仔包病o左, 還是乖乖留家)

之前收email通知, 做空姐o既建議著白色底衫同黑絲襪, 所以一早brief定唔愛著絲襪o既芝士餅, 估唔到換衫時佢好合作啊!  (可能佢早幾日才坐完飛機有印象)

yeah, 換好衫了!  大家各個爸爸媽媽們都好hyper同自己o既小朋友影影影 ~

之後小朋友們便排隊跟空姐姐姐們入去上堂 (呢個時間大人冇得跟既)

我們家長便在出面吹吹水, 因為約30分鐘後家長便可以入去觀課 (但只可以一個家長入去)

呵呵呵, 當門打開, 先見到班小空姐不斷講：「歡迎登機!」呢個情景好可愛!

之後我們入o左一間房扮模擬機艙

小朋友們就扮小空姐示範穿求生衣, 幫我們扣上安全帶

接下來便輪流派餐

佢o地經訓練之後見到我們唔會叫「爸 爸媽媽」

而係叫「先生 / 小姐: 想食咩味朱古力, 想飲咩果汁!」

仲雙手派餐碟tim, 呵呵呵 ~

serve完我們, 家長觀課呢part就完了

之後我們又要出去等, 而小朋友們就繼續上堂

我們大約又在出面吹多30分鐘水, 小朋友們就出來進行畢業典禮

成個活動時間約1小時30分鐘, 按我們收到的email, 小空姐活動如下:

²        第1部份 (75 分鐘)：[** 家長可參與觀課]

機艙教室

登機安全檢測任務**

實戰派餐任務**

儀容化妝指導

緊急應變大測試

逃生充氣滑梯演習

畢業典禮(頒發畢業證書)

²        第2部份 (15 分鐘)：小朋友與家長自由拍照時間

出來啦, 出來啦!

畢業了!!!!

飛機師就有帽帶, 而小空組就加o左條絲巾

講真, 呢個$3xx o既活動, 收費同成效真的有點不成正比 (點可能係1小時30分鐘學到好多野呀)

而且芝士餅佢o地得3歲多, 好多o野可能未必掌握得好好

玩完又未必可以原原本本同我們分享反 (我估5-6歲會好好多, 不過今次玩完芝士餅都有同我講之後姐姐教佢化妝同坐滑梯.........好過乜都話唔知, 哈!)

不過...........媽媽我本住係復活節假期輕鬆下玩玩玩, 貪得意叫做著下套衫體驗下

又可以同班同學仔見下柴娃娃一下, 父母o既集郵相又多o左個回憶呢!

http://www.studentmoveup.com.hk/events.php